EN 
قال الدكتور هاني الناظر استشاري الأمراض الجلدية، إنه بمناسبة قدوم المدارس فهناك بعض الأمراض التي تنتقل بين الأطفال نتيجة الاقتراب من بعضهم لبعض، مثل حشرة الرأس "القمل"، معقباً: "ده من أكتر الحاجات اللي بتسبب إزعاج للأمهات جداً .. وده بيجي في أي وقت وأي مكان مفيش فرق بين مدرسة حكومية أومدرسة خاصة كما يعتقد بعض الأمهات".
وأضاف هاني الناظر خلال لقائه مع برنامج "صباح الورد" المُذاع على قناة "تن"، قائلاً: "لازم كل يوم خميس كل أم تبص على شعر عيالها سواء بنات أو ولاد .. لأن الحشرة ديه بتظهر في ثواني .. ويجب نستخدم حاجة مضادة علطول علشان ميكترش بجانب الفرشاة المخصصة لهذه الحشرة "الفلاية".
وقدم الدكتور وصفة سحرية للتخلص من حشرة الرأس قائلاً: "إذا وجدت الأم حشرة في رأس طفلها فيجب عليها أن تقوم بوضع زيت طعام في شعر الطفل وتقوم بتدليك فروة الرأس بها، وتتركه لمدة 24 ساعة .. وبعدها تقوم بغسل شعر الطفل بالشامبو والمياه .. وبعدها تقوم بتمشيط شعر الطفل بالفلاية .. هتلاقي كل الحشرات نازلة ميتة".
وتابع "الناظر" قائلاً: "اللي هيتبقى في الشعر السيبان "البيض" بتاع الحشرة لأنه بيكون لازق في الشعراية نفسها .. فتتخلص الأم منه بإنها تجيب خل وماء في طبق وتقوم بتدليك شعر الطفل وتركه لمدة ساعتين أو تلاتة .. وبعدها تغسل شعر الطفل بالشامبو والمياه .. وتمشط شعر الطفل بالفلاية هتلاقي السيبان كله نزل".
