الإشراف العام
إلهام أبو الفتح
رئيس التحرير
أحمــد صبـري
الإشراف العام
إلهام أبو الفتح
رئيس التحرير
أحمــد صبـري

اللي يخااااااااف ..يطلع برة !


"الخوف غير حقيقي..المكان الوحيد الذي يمكن للخوف أن يتواجد فيه هو أفكارنا عن المستقبل..انه صنيعة مخيلتنا ..يجعلنا نخاف من اشياء لا وجود لها في الحاضر و ربما لن توجد ابدا ".
 
ده مقطع مترجم من فيديو تحفيزي عن الخوف ..تتفق أو تختلف مع الكلام ده ..هو بـيقنعك إن مفيش حاجة اسمها خوف و بيحاول يوصلك إن الخوف اختيار أفكارنا .. وعلي فكرة فيه خبراء و محللين نفسيين كتير بيقولوا أن الخوف مش حقيقي .. و أنا بقي بقولك ده بلح بالجنزبيل الاشتراوس! مفيش الكلام ده !
الخوف حقيقي جدا.

أنا وانت دلوقتي عندنا حاجات خايفين نعملها.. في حياتنا الخاصة , في علاقتنا , في الشغل و للأسف و احنا خايفين دلوقتي الخوف ده بيسرق منا كل التجارب اللي نفسنا تبقي موجودة في حياتنا ..

يعني مثلا لو كنت خايف تركب طيارة فده هيحد من قدرتك علي السفر و أنك تشوف العالم ! أو تزور حد من صحابك أو أهلك! لو كنت خايف تتكلم قدام ناس كتير فده هيحد قدرتك علي التعبير عن نفسك و أنك تتعرف علي افكار مختلفة عنك .. لو كنت خايف تتكلم مع مديرك أو تطلب زيادة في الاجر علي شغل extra أنت بدأت تعمله فده حيأثر مباشرة علي مستوي معيشتك و الفلوس اللي حتاخدها علي مجهودك !

لو بتحلم تعمل مشروع خاص أو حتي بدأت في مشروعك بس لسه خايف تتكلم مع الناس و خايف تشارك الناس مشروعك .. ده حيوقفك توصل للنجاح اللي بتحلم بيه ..كل اللي اقصده إن الخوف ممكن يبقي السبب في ايقاف كل شيء في حياتك .بـس أنا لسه معاك .. الخوف حقيقي . 

بس هتعمل ايه لو اكتشفت trick / حيلة ممكن توقف أي خوف جواك ؟
حيلة استخدمتها لسنين من أول ما عرفتها قدرت تخليني اتغلب علي حاجات كتير كنت خايفه أعملها أو اقولها و خلتني بقيت بشوف أنا بخاف من ايه ....و بروح اعمله و أنا مش خايفة !

قبل ما اقولك علي السر..عايزه اقولك حقائق علمية عن الخوف حتساعدك تصدق ان الخوف ممكن تتغلب عليه .. و أسمع مني و جرب حتي و لو ليوم واحد نفعت ..خير و بركة ..منفعتش كمل خوف متقلقش مش حيسيبك ..
أول معلومة : الخوف هو حالة مادية في جسمنا physical state وهو بظبط مشابه تماما للإثارة Excitment ..
حقولها تاني الخوف و الإثارة هما بظبط نفس الحالة المادية ! 

Fear & Excitement = Same Physical state
تتسارع نبضات قلبك
قد تتعرق قليلا
قد تشعر بالضيق في صدرك
قد تشعر بقليل من الألم في معدتك
لديك ارتفاع في هرمون الكرتيزول.

دي أعراض الخوف .. و في نفس الوقت نفس الأعراض و انت متحمس لحاجة بتحبها !
دلوقتي تقدر تقولي ايه الفرق بين الخوف و الإثارة أو التحمس ؟
ببساطة الفرق بين الخوف و الإثارة أو التحمس هو: (مايقوم به الدماغ) لما يكون جسمك في حالة من ثَّوَرَان و الحركة .

لو كنت متحمس فعقلك هيتعامل مع الأمر علي انه "الله !! ااااااايه الحلاوة دي ! أنا حنبسط لما مثلا مثلا .. العب قطر الموت اللي في دريم بارك.

بس لو انت خايف عقلك هيتعامل مع الأمر و حيقولك: " آه ! مستحيل ! العمر مش بعزقه مستحيييييل اركبها! دي خطر ! لازم أمشي ! مش هعمل ده ! " حيقولك حاجة مختلفة و عشان كده أهم حاجة تفهم تركيبة إن عقلك ممكن تستخدمه عشان الإثارة و التحمس أو ضدك بالخوف ..

أكيد سمعتوا الحكمة دي في حياتكم : Feel the fear and do it anyway
"أشعر بالخوف و لكن افعلها علي أيه حال."

أو مثلا سمعت من حد أنت شايفه مستفز الجملة دي :
"حاول تهدي و فكر في أفكار ايجابية !"
و 90% النصيحتين دول أنت شفت إن منجحوش يوقفوا الخوف اللي جواك .. صح ؟ فيه أسباب لعدم نجاحها علي فكرة عشان كده تعالوا نرجع للحقيقة رقم 1 اللي هي لما تحسوا بالخوف بيكون الجسم في حالة من الإثارة و الثَّوَرَان و الحركة و قلبك بينبض بسرعة و بتحس إن جسمك كله متخدر و حتلاقي نفسك متوتر و بتكون حاسس بالرعب شوية جواك ..

من صعب جدا الإنتقال لحالة الثَّوَرَان و الحماس و الإثارة و الخوف إلي حالة من الإرتياح!
تخيل كده إنك هادي ؟ هاحححححححح حاسس كده إنك ريلاااااكس ! و جواك حالة الإثارة دي شبه مختفية في نفس اللحظة اللي انت خايف فيها ..مستحيل ! كأنك بتحاول توقف قطر عن طريق رمي زلطة حوالين القضبان ! الزلطة حتخلي القطر ينط برة القضبان ؟ الزلطة دي حتتسبب في كارثة ؟ لأ طبعا ! و علي علميا لما بتحاول تتجاهل مخاوفك فده بيخلي الأمر أسوأ و اثبتت الأبحاث كمان أن التفكير الإيجابي لوحده ممكن يخلي مخاوفك توصلك لوضع أسوأ ! دلوقتي حتقولي أنتي عايزه ايه ؟ طب نعمل ايه ؟ و فين ام السر ! يعني أعمل ايه أنا لما أكون خايف و عايز أكلم مديري ؟ هعمل ايه أنا لما أكون خايف و عندي فوبيا من الطيارات و مضطر أركب طيارة ! هعمل ايه لو عندي presentation و لازم أتكلم قدام ناس كتير !

حتستخدم السر اللي استعملته و ساعدني اتغلب علي كل المخاوف ! في أي موقف فيه توتر و رعب من حاجة الطريقة سهله جدا ..حتستخدم حاجة اسمها قاعدة الخمس ثواني 5 - second rule
اخترعتها واحدة اسمها Mel Robbins هي لايف كوتش و مؤلفة لو عايز تصدق أكتر خش علي جوجل و حتلاقي حالات طبقت السر ده أو الطريقة دي و تغلبت علي أكتر حاجة مخوفاها في حياتها!

هي اخترعت حاجة اسمها قاعدة الخمس ثواني و فكرة بديلة و هي عبارة عن إنك بتعيد صياغة فكرة عقلك اتعود يفكر فيها بشكل معين ..

الحيلة دي حتنقل عقلك من الشعور بالقلق و الخوف لصياغة الفكرة إنها تكون محمسة و فيها اثارة تقنع عقلك بيها ..

يلا نلعب ؟

قبل مانبدأ ! الطريقة دي زي السحر ! استخدمتها بقالي سنين وهي كمان و ناس كتير و نجحوا !
لما تتعامل مع الخوف علي انه مشاعر فسيولوجيه أنت قادر تتحكم فيها ... حتبقي لعبة بالنسبالك تحول أي حاجة مخوفاك لحاجة متحمس تعملها !

و ال mind trick دي تم اثباتها بواسطة العلم و التجربة ! كل ما بتوتر و قلبي بيدق بسرعة بقول لنفسي إني متحمسة أعمل اللي خايفة منه أي كان الموقف ولما بقول كده لنفسي أنا برسل رسالة لعقلي و اللي بيقول لجسمي ليه أنا منفعلة و متحمسة فبيوصلني إني مبقاش خايفة.

..لسه فاكر ؟ الإثارة و الخوف هما نفس الشيء في جسمك الفرق الوحيد هو مايطلقه عليهما عقلك !
لو أنت لازم تعمل حاجة حتخليك متوتر و أنت بتعملها أو خايف تعملها قبل ما تكون مستعد تعملها استخدم فكرة إنك تصيغ فكرتك و ده هيساعدك إنك متبوظش الدنيا أو إنك تخش في نوبة هلع فدي وسيلة عشان تشجع و تساعد نفسك بنفسك عشان تقدر تسيطر علي اللي بتفكر فيه من سيناريوهات منيلة ..الحاجة التانيه عد من 1 ل 5
12345
حتقول ايه الهبل ده ؟ سمعااااك
دي خطوة ضرورية جدا .. و السبب إن كتير و أنا منهم نجح في إن يعمل اللي مخوفه من خلال قاعدة الخمس ثواني 12345 هو انها ضرورية لأن دي الطريقة لتغيير التروس اللي في عقلك و زي مابتقول ميل روبنز "طريقة لأيقاظ قدراتك المخية مما يؤدي إلي ان يكون عقلك الآن في حالة سيطرة علي أفكارك " من خلال أنك تعد 12345 و انت بتعد الخمس ثواني دول الخوف حيقف ! ليه و ازاي ؟ عشان انت خليت أفكارك و عقلك يستقروا و يهدوا و بالتالي حيكون مستعد دلوقتي إنك تصيغ الفكرة اللي مخوفاك من أول و جديد ..

ده اللي بعمله بعد مابستخدم قاعدة الخمس ثواني 12345 هو اني بدخل الفكرة الجديدة اللي بصيغها جوايا.
غمض عنيك و عد من 1 ل 5 و خد نفس و غير الفكرة المرعبة المسيطرة عليك لحاجة أنت عايزها.
لما تعمل كده حتلاقي عقلك مرتاح لأنك وقفت الخوف و قدرت تسيطر عليه ! و خليت الmind trick دي تصحي قدرات في مخك.

أنت مستعملتهاش قبل كده عشان مسمعتش عنها و نظرا لأن عندك صورة ليها معني من حيث السياق إلي عقلك إن الخوف و الإثارة هما نفس الشيء و مفيش فرق بينهم ألا عن طريق اللي عقلك بيختار يقولهلك ! لما تلاقي عقلك قادر من اعادة صياغة أفكار الخوف إلي أفكار من الإثارة حتبقي عارف إن دلوقتي عندك رؤية ليها معني و استناد و اثبات كمان للانت حتعمله .. فعقلك حيشتري الفكرة و حيصدقها .. أنت بس بتخدع عقلك عشان تقدر تعمل أي حاجة خايف تعملها!

لو كان الخوف موقفك .. فده حيغير حياتك ! جوجل و خش شوف كام واحد غير حياته و عمل أكتر حاجة مخوفاه و نجح بس عن طريق الحاجتين دول اللي عقلك بيقاوم و بيقولك أفكار تخليك حتي متجربش تعملها بينك و بين نفسك . جرب تشوف الهاشتاج ده #5SecondRule و حمس نفسك و شوف بنفسك إزاي كل واحد واجه أكتر حاجة مخوفاه و اتغلب عليها !

حاجتين اتنين بس

قاعدة الخمس ثواني
إعادة صياغة أفكارك من الخوف إلي الإثارة

أنت مش هتعرف تسيطر علي المشاعر اللي حتثور جوه جسمك لما تكون في طيارة و انت عندك فوبيا أو وانت رايح تكلم مديرك أو لما تكلم حد أنت معجب به و نفسك تكلمه بس تقدر تتحكم دايما في اللي بتفكر فيه و تقدر دايما تاخد القرار اللي انت عاوزه .

و اللي يخاااااااف مش بس حيطلع بره ده حيفضل في مكانه و مش حيخش أي مكان نفسه يجربه أو يروحه أو يحسه ! حنفضل خايفين و احنا كده كده حنموت ؟ فكر فيها مع نفسك حتلاقي إن أكتر حاجة ممكن تكون خايف منها أو خايف تعملها حتكون سبب في إنك تكون سعيد و فرحان فرحة مفرحتهاش بقالك كتير أو مفرحتهاش اصلا !
المقالات المنشورة لا تعبر عن السياسة التحريرية للموقع وتحمل وتعبر عن رأي الكاتب فقط