نقص الفكة .. صداع في رأس أصحاب المحلات.. الـ 100 بـ 110.. وبالباقي لبان

«نقص الفكة عملنا صداع وبنبيع بخسارة علشان مفيش فكة والزبون بقى بيمشي زعلان علشان الباقي»، بتلك الكلمات بعث حماده شاكر، أحد قراء موقع «صدى البلد» الإخباري، رسالته للموقع يشكو من نقص الفكة فئة 1 جنيه بالأسواق سواء كانت ورقية أو معدنا.

وقال شاكر في رسالته: «عندي محلات تجارية ومبلاقيش فكه للزبائن، وفي الاخر بقينا بنروح نشتري الـ 100 جنيه فكه بـ 110 علشان مش لاقيين، والمشكلة دي عملت صداع كبير لأصحاب المحلات التجارية، وفيه ناس بتزعل علشان مفيش باقى يأخذوه»، متابعا: «لما بنقول لواحد مفيش فكه وخد بالباقي لبان بيبصلنا بقرف كأننا بنشحت الباقي منه».

وأضاف، أن جميع الجهات لديها علم بنقص الفكة في الأسواق ، قائلا: «اشتكينا كتير لكل الجهات المختصة ومنهم البنك المركزي ومصلحة صك العملة والخزانة العامة للدولة والبنوك، وكل الجهات دي مبتلقيش عندها فكه، ومفيش حد منهم اتدخل لحل المشكلة».

وناشد شاكر في رسالته، جميع الجهات بضرورة التحرك لحل تلك المشكلة قائلا: «ياريت الدولة تتدخل لحل المشكلة علشان حرام التاجر يخسر أو الزبائن تفكره حرامي بيسرق باقي فلوسهم».

ويقدم موقع صدى البلد الإخباري، خدمة لاستقبال شكاوى القراء والعمل على حلها مع المسئولين من خلال الخط الساخن 5731 أو من خلال رقم الواتس آب 01025555056.