EN 
أصبح دخول العديد من الأزواج خاصة الشباب عالم السوشيال ميديا أمر واقع يواجهون على أثره العديد من التعليقات الإيجابية والسلبية بحدود قد تتقارب أحيانا بينما تتفاوت أحيانا أخرى حسب طريقة ظهورهما ومحتواهما المعلن للملايين، وفي هذا السياق، أثارت مطربة الجدل بسبب هجوم متابعيها حيث كانت من بين تعليقاتهم: «عملاله عمل تحت ظفر نملة، جوزيني جوزك يا رب تطلقوا».
على مدار الساعات القليلة الماضية، أثارت المطربة الشابة والبلوجر شريهان شوكت وزوجها ياسر حالة كبيرة من الجدل وذلك بعد ظهورها في مقطع فيديو بعنوان: «عملت لجوزي عمل» ترد فيه على تعليقات المتابعين على آخر مقطع فيديو سابق لها مع زوجها.
تعليقات سلبية تنتقد الزوجة
وقرأت شريهان شوكت نماذج من تعليقات متابعيها السلبية على علاقتها بزوجها، قائلة: « ما كنتش عاوزة أعمل الفيديو دا بس ياسر أصر ردا على كمية الكومنتات الرهيبة اللي على الفيديو اللي فاتت، أنا ما عرفش فين قلة الذوق اللي عملتها بجد، أول كومنت من اللي شوفتهم بيقول: كنا عاوزين نعرف اسم العفريت اللي جوزهولك؟ معلقة عليها: “عملت لك عمل تحت ظفر نملة”».
وكانت من بين تعليقات المتابعين التي عرضها شريهان شوكت أيضا: «هو دا زوجها افتكرته أخوها أو ابنها»، «الصراحة هو محترم وانت رخمةجدا»، «ممكن أتجوز زوجك؟!»، صحيح هو مهذب وهي قليلة الذوق»، «أقسم بالله كنت فاكرة انه ابنها الصغير وفعلا بتتكلم معاه اسكت انت»، «معلش زوجك كان أحول لما اختارك»، «ياسر طلقها انت بتقبض كام»، «شكلها مفترية وهو طيب»، «محايه شخصيته، قمة قلة الذوق»، «يا رب تطلقوا علشان قرفنونا»، «متجوزها على ايه، دي زوجها طالحة».
ردة فعل الزوج
وفي ظل مقطع الفيديو الذي لم تتعد مدته الـ 9 دقائق، رد الزوج معلقا: «التعليقات مصعبة الدنيا ليه مش لازم حد يكون مسيطر، احنا مجرد زوجين متفاهمين وفي علاقة متوازنة، واللي ما يعرفهوش كتير: إني حاربت علشان أتجوزها، دي قمر -مقبلا يدها-، وبنحب بعض كدا، فين المشكلة بكل بساطة، ولا تاخدوها على قلبكم».
الفيديو المتسبب في الأزمة
وعن تفاصيل مقطع الفيديو السابق للزوجين والذي تسبب لهما في أزمة، قالت شرهان شوكت خلاله لزوجها ياسر حيث كانا يعرضان تجربة تذوقهما لمجموعة من حبات الفاكهة النادرة والمرتفعة السعر عن مثيلاتها المنتشرة حيث كان يبلغ متوسط سعر الكليو منها 500 جنيه: «بس اسكت انت، استني بس، بتتقطع ازاي يا اسطا، ممكن ادمرك، بتقشر نفسها، نفس الفكرة، جيب لينا منديل».
وتسبب هذه الكلمات التي قالها شريهان شوكت لزوجها خلال مقطع الفيديو في هجوم متابعين لهما، فكانت من تعليقاتهما: «صح لما تقوليله أنا ممكن أدمرك لو قلت شبه التين الشوكى ولما تقلبى شفايفك وتقولى بكل قرف ندى دى لعمتك كما لو كانت عمته دى تستاهل تاخد الأشياء اللى حضرتك قرفانه منها.. كل ده ومش شايفه انذ بتكلميه بطريقه غير لائقة !!! على الأقل لمى الدور قدام الناس ومثلى الاحترام شوية»، «طيب المفروض انتي اللي تجيبي الحاجه كل شويه تقولي قوم هاتي حاجه انا مش فاهم مين الراجل ومين الست».
وردت شريهان شوكت على ذلك، معلقة: «إيه يا جماعة كمية الكيوت دى معقول كلكم ناس رقيقة كدة مع ازواجكم، بلس انا وجوزى مش بنتعامل كاننا متجوزين احنا صحاب قبل اى حاجة وهو يمكن مش واخد على الكاميرا فا شوفتوه كدة، بس هو مش كدة نهائى فا ياريت محدش يدخل فى طريقتى ولا يدخل هو طالع يتكلم ازاى كل واحد حر، بلس انى مشوفتش انى بكلمه ب طريقة وحشة اصلا، مش عارفة انتو شايفين منين بظبط».
كما دعمها تعليقات أخرى، شملت: «أنا لسه متابعه جديده بس انت وشكلك قمر والله حلو بس انت احلى يعني حاسه روحك احلى لذيذه في كلام»، «انتى قمر بجد والله ودمك خفيف بس صدقينى متخليش الناس دى تأثر عليكى دى ناس مريضه، بحبكم جداا ربنا يخليكو لبعض يارب»، «سيبك منهم دول ناس مريضه ومتغاظين منك انتي عسل اوي ماشاء الله »، «عنيكي شبه لبني عبد العزيز وانتي لا تقلي عنه جمال ربنا يسعدكم».
