EN 
الأسئلة المقالية تثير الجدل بين طلاب المرحلة الثانوية، والذين لا يعلمون حتى الآن إذا ما كانت الأسئلة المقالية ستكون جزءا من امتحانات الثانوية العامة 2022 أم لا، وهو ما دفع الكثيرين لسؤال الوزير طارق شوقي وزير التربية والتعليم والتعليم الفني عن هذا النوع من الأسئلة وعن إمكانية أن يكون من ضمن أسئلة امتحان 2022 أم لا.
أجمع أولياء أمور طلاب الثانوية العامة علي ضرورة الإبقاء علي منظومة امتحانات الثانوية العامة كما كانت عليه في العام الماضي سواء من حيث الشكل أو المضمون.
أعلنوا رفضهم القاطع لإضافة أية أسئلة مقالية إلي امتحانات هذا العام ..
وقالوا إن طلاب الصف الثالث الثانوي العام تلقوا دروسهم وتدربوا علي الطريقة التي جاءت بها أسئلة الامتحان في العام الماضي والتي لم تتضمن أية أسئلة موضوعية وكانت تعتمد علي الفهم والتحليل وتبتعد عن الحفظ والتلقين كما انهم لم يمسكوا ورقة ولا قلم منذ تلات سنوات وليس من المنطقي ان نطالبهم بالكتابة الآن .
قال سامي الدغيتي انني أرى أن نظام البابل شيت هو الأنسب للامتحان هذا العام لاعتبارات كثيرة أهمها الاستعداد النفسي لدى الطلاب ونجاح التجربة لحد كبير العام الماضي.
وأضافت سناء النجار ولي امر طالبة بالدقهلية، إن أبناءنا تدربوا علي امتحان العام الماضي ونوعية الأسئلة، يعني مفيش مقالى اطلاقا وده من اول السنة واحنا سنة مصيرية مش نقل علشان يبقي فيه تغيير في اللحظات الأخيرة والموضوع مختلف تماما في الثانوية العامة عن سنوات النقل.
واشارت الي انه في اللغة العربية التعبير والقصة لم تعد أسئلتها مباشرة ولا سرد وخلاص او ان الطالب حافظ موضوع تعبير يروح ينقشه فالنظام اتغير تماما في أسئلة الاختيار من متعدد وكذلك باقي مواد اللغات الانجليزي والفرنساوي والألماني يعني الموضوع مش سهل كده انه يتغير ده لازم الطالب يبقى عارف من أول السنة أو الشهور اللى فاتت لكن كدة هتبقي مذاكرة الشهور دي كلها في الفاضي والعيال تضيع.
وتابعت: من حقنا نبقي عارفين من اول العام بس لو عارف بناء عليه طريقة الشرح والتدريب هتختلف يعني بقالنا شهور من اخر الصيف بنحل بطريقة إزاي فاجأة تتغير يبقي اللي فات كله ملوش لازمة طب ده ينفع و بعدين احنا مشينا على اللى عمله بالضبط مع طلاب الثانوية العامة العام الماضي يعني ماشيين على نفس طريقة امتحان العام الماضي لو كان عايز يغير يبقي من بداية العام انما يجي على باله فاجأة يغير تبقي مصيبة الموضوع مش عند معانا وانتقام يعني أنا معنديش مشكلة انه يغير بس من اول السنة علشان نبقي بدأنا صح اي تغير دلوقت يبقي محتاج شهور تاني من الأول علشان يتدربوا تاني على كل حاجة دروسها بأسئلة مقالية وده صعب لان مفيش وقت اصلا.
وقالت ماجدة احمد ولي امر من القاهرة، أن كدة هيجمع الامتحان بين الموضوعي والمقالي ، يبقى كده نجمع بين التصحيح الإلكتروني للموضوعي عبر البابل شيت فهو وسيلة ناجحة جدا، وبين العنصر البشري لتصحيح الجانب المقالي، ودا هيبقي ظلم.
وأوضح صالح الشاذلي ولي امر من المنوفية ان امتحان البوكليت افضل من البابل شيت وان يكون إجابة الأسئلة الموضوعية بالاختيار من متعدد بنفس الورقه منعا للارتباك ونظرا لتوتر الطلبة أثناء الامتحان.
وقال علاء عوض، معلم بمدرسة ثانوي، أرى ضرورة امتحان الطلاب على التابلت فى الشهادة الثانوية ومراحل التعليم الثانوي وان يكون هناك أسئلة مقالية وفقاً لما أعلن عنه المركز القومي للامتحانات لأن نوعية الأسئلة التى جاءت كمقياس لمن سيضع امتحان اولى وثانية ثانوى رائعة وفعلا تقيس قدرات الطلاب تحليل وتطبيق وفهم وتلك هى الغاية التى ننادى بها وتلك هى الغاية التى يرغبها الوزير من تطوير التعليم لكن غير ذلك تبقي الأمور تدار على غير ما يرام.
وكان الدكتور طارق شوقي، وزير التربية والتعليم والتعليم الفني، عبر عن استيائه الشديد من انشغال طلاب الثانوية العامة وأولياء الأمور بسؤال “هل امتحانات الثانوية العامة 2022 سيكون بها أسئلة مقالية أم لا؟”.
وقال وزير التربية والتعليم: “أنا لو طالب اتكسف اسأل السؤال ده، لأن ببساطة التعليم مش كده خالص”.
